Foydalanish shartlari

Oxirgi yangilanish: 2026-10-10

Qisqacha

Vazifa.io — tekshiruv va vazifalarni boshqarish xizmati. Siz uni o'z biznesingiz uchun ishlatasiz.
Xizmat barqaror ishlashi uchun oqilona harakat qilinadi, to'langan tarifdagi imkoniyatlar taqdim etiladi. Boshqa kafolatlar berilmaydi.
Kiritilgan ma'lumotlar va ularning qonuniyligi uchun ularni kiritgan tomon javob beradi.
Har bir tomon o'z hududida xavfsizlikni ta'minlaydi: Ijrochi — Xizmat tomonida, Mijoz — akkaunt, parol va qurilmalar tomonida.
Pul masalalari Ommaviy ofertada, shaxsiy ma'lumotlar Maxfiylik siyosatida yozilgan.

Bu hujjat Vazifa.io xizmatidan foydalanishning umumiy shartlarini belgilaydi. Xizmatdan foydalanishni boshlagan yoki akkaunt yaratgan tashkilot yoki tadbirkor bu shartlarni qabul qilgan hisoblanadi.

1. Atamalar

1.1. Xizmat — Vazifa.io veb-sayti, boshqaruv paneli va «Vazifa» mobil ilovasi.

1.2. Ijrochi — «Vazifa.io» nomi ostida Xizmatni taqdim etuvchi, o'zini o'zi band qilgan shaxs sifatida faoliyat yuritayotgan Omonjon Amirkulov. Ma'lumotlari Ommaviy oferta oxirida keltirilgan.

1.3. Mijoz — Xizmatdan foydalanayotgan tashkilot yoki yakka tartibdagi tadbirkor.

1.4. Foydalanuvchi — Mijoz akkaunt ochib bergan shaxs (ega, menejer, xodim).

1.5. Mijoz ma'lumotlari — Mijoz va Foydalanuvchilar Xizmatga kiritgan barcha ma'lumot: chek-listlar, javoblar, izohlar, rasm, video, ovozli xabar, hujjatlar, xodimlar ro'yxati va boshqalar.

1.6. Tomonlar — Ijrochi va Mijoz.

2. Xizmat tavsifi

2.1. Xizmat chek-list yaratish, tekshiruvlarni jadval bo'yicha o'tkazish, natijalarni saqlash, vazifa berish, hisobot va statistika ko'rish uchun mo'ljallangan.

2.2. Imkoniyatlar tarifga qarab farq qiladi. Tariflar va narxlar Ommaviy ofertada va saytdagi «Narx» bo'limida ko'rsatilgan.

2.3. Xizmat rivojlanib boradi. Imkoniyatlar qo'shilishi, o'zgarishi yoki olib tashlanishi mumkin. To'langan davr ichida to'langan tarifning asosiy imkoniyatlari saqlanadi.

2.4. Faqat kasbiy foydalanish uchun. Xizmat tashkilotlar va tadbirkorlar uchun, ularning tadbirkorlik yoki kasbiy faoliyatida foydalanishga mo'ljallangan. Jismoniy shaxslarning shaxsiy, oilaviy yoki maishiy ehtiyojlari uchun mo'ljallanmagan. Mijoz Xizmatdan faqat kasbiy maqsadda foydalanishini tasdiqlaydi.

3. Taqdim etiladigan xizmat

3.1. Xizmat barqaror ishlashi uchun oqilona harakat qilinadi.

3.2. To'langan tarifdagi imkoniyatlar taqdim etiladi. Agar to'langan davrda biror imkoniyat taqdim etilmasa va Mijoz Ijrochini yozma ravishda rasmiy ogohlantirsa, ogohlantirish kelgan paytdan boshlab taqdim etilmagan muddat uchun to'lov Mijoz tanloviga ko'ra qaytariladi yoki keyingi davrga hisobga olinadi (batafsil: Ommaviy oferta, 8-band).

3.3. Bu ikki holatdan tashqari Xizmat «qanday bor, shunday» holatda taqdim etiladi. Xizmatning uzluksiz va xatosiz ishlashi, har qanday qurilma va tarmoqda bir xil ishlashi yoki Mijozning aniq maqsadiga mos kelishi kafolatlanmaydi.

3.4. Texnik ishlar oldindan xabar qilinishi mumkin. Xavfsizlik yoki favqulodda tuzatishlar xabarsiz bajarilishi mumkin.

4. Akkaunt va xavfsizlik

4.1. Akkaunt ochgan shaxs Mijoz nomidan harakat qilish huquqiga ega ekanini tasdiqlaydi.

4.2. Mijoz o'z Foydalanuvchilarining harakatlari uchun javob beradi. Akkaunt ostida bajarilgan harakat akkaunt egasining harakati hisoblanadi.

4.3. Parol va kirish kodlarini sir saqlash, qurilmani himoyalash, ishdan ketgan xodimning akkauntini o'z vaqtida to'xtatish yoki o'chirish — Mijoz va Foydalanuvchining vazifasi.

4.4. Ruxsatsiz kirish shubhasi paydo bo'lsa, Mijoz parolni almashtiradi va support@vazifa.io orqali xabar beradi.

5. Mijoz ma'lumotlari

5.1. Mijoz ma'lumotlari Mijozniki. Ijrochi ularni faqat Xizmatni ko'rsatish uchun zarur doirada qayta ishlaydi.

5.2. Mijoz ma'lumotlarning to'g'riligi va qonuniyligi uchun javob beradi. Xodimlarning shaxsiy ma'lumotlarini (ism, telefon, joylashuv, rasm, ovoz) qayta ishlash uchun qonunda talab qilingan asos va rozilikni, shu jumladan ma'lumotlarning chet elga uzatilishi uchun rozilikni, Mijoz o'zi ta'minlaydi.

5.3. Mijoz maxfiy, qonun bilan cheklangan yoki xavfli ma'lumotlarni (parol, bank karta raqami, shaxsiy hujjat nusxasi va shunga o'xshash) Xizmatga yuklamaydi. Tekshiruv uchun zarur bo'lmagan ma'lumotni yig'masligi tavsiya etiladi.

5.4. Fayllarni saqlash. Rasm, video, ovozli xabar va hujjatlar uchinchi tomon bulutli ombori — Cloudflare R2 xizmatida saqlanadi. Bu omborning serverlari O'zbekiston tashqarisida joylashgan bo'lishi mumkin. Batafsil: Maxfiylik siyosati.

5.5. Zaxira nusxa. Xizmat arxiv sifatida mo'ljallanmagan. Muhim fayl va hisobotlarning nusxasini Mijozning o'zi ham saqlab borishi, Xizmatda mavjud eksport funksiyalaridan foydalanishi tavsiya etiladi.

5.6. Ma'lumotlarni qayta ishlash tartibi Maxfiylik siyosatida yozilgan.

6. Taqiqlangan harakatlar

6.1. Quyidagilar taqiqlanadi:

Xizmatga yoki boshqa Mijozlarning ma'lumotlariga ruxsatsiz kirishga urinish;
Xizmat ishini buzishga qaratilgan harakatlar: ortiqcha yuklama, zararli kod, parolni terib topish va shunga o'xshashlar;
Xizmatdan qonunga zid maqsadda foydalanish, noqonuniy kontent yuklash;
Xizmatni va uning kodini nusxalash, qayta sotish, ruxsatsiz ommaviy avtomatlashtirilgan so'rovlar yuborish;
Boshqa shaxs nomidan akkaunt ochish.

6.2. Buzilish aniqlansa, akkaunt cheklanishi yoki to'xtatilishi mumkin. Qasddan buzilishda to'langan summa qaytarilmasligi mumkin.

7. Intellektual mulk

7.1. Xizmatning dasturiy ta'minoti, dizayni, nomi va belgisi Ijrochiga tegishli. Mijozga Xizmatdan shartlar doirasida foydalanish uchun cheklangan, eksklyuziv bo'lmagan, boshqaga berilmaydigan huquq beriladi.

7.2. Mijoz ma'lumotlari Mijozda qoladi. Mijoz Ijrochiga ularni Xizmatni ko'rsatish uchun zarur doirada saqlash, ko'rsatish va qayta ishlash huquqini beradi.

7.3. Mijozning Xizmat bo'yicha taklif va fikrlaridan Ijrochi Xizmatni yaxshilash uchun haq to'lamasdan foydalana oladi.

8. Mas'uliyat taqsimoti

8.1. Ijrochi tomonida. Ijrochi Xizmat tomonida ma'lumotlarni himoyalash uchun oqilona texnik va tashkiliy choralarni qo'llaydi.

8.2. Mijoz tomonida. Mijoz o'z Foydalanuvchilari, ularning akkauntlari, parollari, qurilmalari va kiritgan ma'lumotlari uchun javob beradi.

8.3. Mutlaq himoya haqida. Hech bir axborot tizimi to'liq himoyalangan bo'lmaydi. Ma'lumot va fayllarning yo'qolmasligi, sizib chiqmasligi yoki Xizmatga ruxsatsiz kirilmasligi kafolatlanmaydi.

8.4. Ijrochi javobgar bo'lmaydigan holatlar. Quyidagi holatlar yuz bersa, zarar uchun Ijrochi javobgar bo'lmaydi:

Xizmatga yoki ma'lumotlarga ruxsatsiz kirish Mijoz yoki Foydalanuvchi tomoni sababli yuz bergan: parol boshqaga berilgan, qurilma yo'qolgan yoki buzilgan, firibgarlik xabariga aldanilgan;
uchinchi shaxslarning tashqi hujumi (xakerlik, zararli dastur);
uchinchi tomon xizmatlarida muammo yuz bergan: aloqa operatori, SMS va bildirishnoma yetkazuvchilari, bulutli xizmatlar (Cloudflare R2 ni ham o'z ichiga oladi), do'kon platformalari;
fayl yoki ma'lumot Mijoz yoki Foydalanuvchi tomonidan o'chirilgan;
Mijoz kiritgan ma'lumot yoki Mijozning harakati tufayli, jumladan muhim ma'lumotning zaxira nusxasi saqlanmagani sababli;
tomonlarning nazoratidan tashqari holatlar (fors-major, 12-band).

8.5. Bilvosita zarar. Daromad kamayishi, mijozlarni yo'qotish, obro'ga yetgan zarar kabi bilvosita zararlar uchun Tomonlar bir-biri oldida javob bermaydi.

8.6. Chegara. Ijrochining jami moddiy javobgarligi Mijoz zarar yuz berishidan oldingi 12 oy ichida to'lagan summa bilan chegaralanadi.

8.7. Uchinchi shaxslar. Har bir tomon o'z harakati tufayli uchinchi shaxslar oldida yuzaga kelgan talablar uchun o'zi javob beradi.

8.8. Qarorlar. Tekshiruv natijalari asosida qabul qilinadigan qarorlar Mijozning o'z huquqi va mas'uliyati.

8.9. Qonun ustuvor. Bu band qonun bo'yicha cheklab bo'lmaydigan javobgarlikka ta'sir qilmaydi. Shaxsiy ma'lumotlar sizib chiqishi holatida xabar berish va boshqa majburiyatlar qonunda belgilangan tartibda bajariladi.

9. Pullik tariflar

9.1. To'lov tartibi, narxlar, sinov muddati, xodim soni bo'yicha hisob-kitob, qaytarish va to'xtatish qoidalari Ommaviy ofertada yozilgan. Ular Foydalanish shartlarining ajralmas qismi.

10. Akkauntni to'xtatish va o'chirish

10.1. Mijoz istalgan vaqtda Xizmatdan foydalanishni to'xtatishi yoki akkauntni o'chirishni so'rashi mumkin.

10.2. Akkauntni o'chirish so'rovi support@vazifa.io manziliga yuboriladi; so'rov qabul qilingandan keyin Mijoz ma'lumotlari 30 kun ichida o'chiriladi. Zaxira nusxalar 5 yilgacha saqlanishi mumkin va saqlash muddati tugagach avtomatik o'chiriladi. Qonun yoki xavfsizlik talab qilgan yozuvlar (masalan, faoliyat jurnali) uzoqroq saqlanishi mumkin. O'chirishdan oldin kerakli ma'lumotlarni olib qo'yish Mijozning vazifasi.

10.3. Free tarifda 12 oydan ortiq faol bo'lmagan akkauntlar va ularning ma'lumotlari elektron pochta orqali oldindan xabar berib o'chirilishi mumkin.

10.4. Shartlar buzilganda, to'lov o'z vaqtida qilinmaganda yoki xavfsizlik xavfi bo'lganda Ijrochi akkauntni cheklashi yoki to'xtatishi mumkin. Imkon bo'lsa, oldindan xabar beriladi.

11. Xabarnomalar

11.1. Tomonlar o'rtasidagi xabarlar elektron pochta orqali yuboriladi. Mijoz ko'rsatgan pochta manzilining to'g'riligi va ochiqligi uchun Mijoz javob beradi.

11.2. Mijozga yuborilgan xabar yuborilgan paytdan boshlab olingan hisoblanadi.

12. Fors-major

Tomonlardan hech biri, agar majburiyatni bajarmaslik tomonlar nazorat qila olmaydigan favqulodda holat (tabiiy ofat, urush, davlat organlarining qarori, keng ko'lamli aloqa yoki energiya uzilishi, kiberhujum) tufayli yuz bergan bo'lsa, javobgar bo'lmaydi.

13. Shartlarning o'zgarishi

13.1. Shartlar yangilanishi mumkin. Muhim o'zgarishlar kuchga kirishidan kamida 14 kun oldin elektron pochta yoki Xizmat ichida e'lon qilinadi. Ommaviy oferta o'zgartirilishi o'z 10-bandida belgilangan tartibda amalga oshiriladi.

13.2. O'zgarishdan keyin Xizmatdan foydalanishni davom ettirish yangi shartlarni qabul qilish hisoblanadi. Qabul qilmagan Mijoz Xizmatdan foydalanishni to'xtatadi.

14. Umumiy qoidalar

14.1. Bu shartlar, Ommaviy oferta va Maxfiylik siyosati Tomonlar o'rtasidagi kelishuvning to'liq mazmunini tashkil qiladi.

14.2. Shartlarning biror bandi haqiqiy emas deb topilsa, qolgan bandlar kuchda qoladi.

14.3. Ijrochi huquq va majburiyatlarini boshqa shaxsga o'tkazishi mumkin. Mijoz buni faqat Ijrochining roziligi bilan qila oladi.

14.4. Huquqdan foydalanmaslik undan voz kechish hisoblanmaydi.

14.5. Hujjatning o'zbekcha matni asosiy hisoblanadi. Boshqa tillardagi tarjimalar ma'lumot uchun.

15. Nizolar va qo'llanadigan qonun

15.1. Bu shartlarga O'zbekiston Respublikasi qonunchiligi qo'llaniladi.

15.2. Nizolar avval muzokara yo'li bilan hal qilinadi: yozma da'vo kelgan kundan 30 kun ichida. Kelishuvga erishilmasa, nizo Toshkent shahridagi vakolatli sudda ko'riladi.

16. Bog'lanish

Savol va takliflar uchun: support@vazifa.io